Odatiy hol – ko'z yoshim
Yuvib ketar quvonchim.
Qo'ying menga ishonmang,
Oqlolmayman ishonchni.
Odatiy hol – omadim
Kulmas mening sira ham.
Qo'ying, menga do'st bo'lmang,
Mening sodiq do'stim g'am.
Odatiy hol – uchrashib,
Kulib quchoq ocharlar.
Do'stga dardim aytmayman,
Aytmasimdan qocharlar.
Odatiy hol – ortimdan,
G'iybat quvib yuradi.
Ichu bag'rim qon mening,
Ko'zim kulib turadi.
Odatiy hol – parishon,
Tunda shahar kezaman.
Demasangiz ham daydi,
Nigohlardan sezaman.
Odatiy hol – onamning
Qo'li tolmas duodan.
Ko'nglimdagi yo Rabbim,
Nima bo'lsa Xudodan.
Odatiy hol – ko'z yoshim
Yuvib ketar quvonchim.
Qo'ying menga ishonmang,
Oqlolmayman ishonchni.
